Warkworth's Chronicle 1473. Sep 1473. Also in the xiij. yere of [the] regne of Kynge Edwarde, Sere Jhon Veere, Erle of Oxenforde, that withdrewe hym frome Barnet felde, and rode into Scottlonde, and frome thens into Fraunce asailed¹, and ther he was worschipfully received. And in the same yere he was in the see withe certeyne schippes, and gate grete good and rychesse, and afterewarde came into westecountre, and, with à sotule poynte of werre, gate and enteryd Seynt Michaels Mount in Cornwayle, a stronge place and a mygty, and can not be geett yf it be wele vytaled withe a fewe menne to kepe hit; for xxti. menne may kepe it ageyne alle the world. So the seyde Erle, withe xx^ti, score menne save iij², the last day of Septembre the yere afore seyd, enteryd fyrst into [the] seyd mount, and he and his menne came doune into cuntre of Cornwale, and hade riyhte good chere of the comons, &c. The Kynge and his counselle sawe that therof myche harme myght growe, &c.; comawndyd Bodrygan, scheff reulere of Cornwayle, to besege the seid mount. And so he dyd; and every day the Erle of Oxenfordes menne came doune undere trewis, spake with Bodrynghan and his menne; and at the laste the seid Erle lacked vytayle, and the seyde Bodrygan suffryd hyme to be vytailed; and anone the Kynge was put in knowlache therof; wherefor the seide Bodrygan was discharged, and Richard Fortescu, squyere for the body, by auctoryte of the Kynge, toke uppone honde to lay sege to the forseide mount, &c.