Stonor Letters is in Letters.
The Stonor letters and papers, 1290-1483; ed. for the Royal historical society, from the original documents in the Public record office, by Charles Lethbridge Kingsford.
6th March 1478. Elizabeth Croke [aged 38] to William Stonor [aged 28].
Ryght reverent and worschypffull and interely best belovyde husbonde, I recomaunde me unto you in the most harteyste wyse hever more desyryng to here off your goode wellfare, the wyche I pray God longe to contune unto your hartys desyr. Syr, I resayved a tokyn ffrom you by Tawbose, my lorde Lovellys [aged 22] sarvant. And Syr, I have sent my lorde Lovell a tokyn and my ladys, as ye comaunde me to do, schuche as schalle plese them. Syr, ye schalle understonde that þe beschope off Bathe [aged 58] ys browthe in to the Towre [Map] syne you departyd. Allso Syr, ye schalle understonde that þe wolle hooys departe, as to morw is, ffor as I understonde: I pray Jhesu by thayr goode spede: and Goodard. [Goddard Oxbryge.] departys allso: and I pray you that ye wylle sende me som off your sarvantys and myne to wayte upone me, ffor now I ame ryght bare off sarvantys, and þat ye know well. Syr, I sent you halffe a honder welkys by Gardenar, and I wollde have sent you som hoder desys, but truly I cowde not get none: but and I cane get hony to morow, syr Wylliam salle bryng hyt with hym. Syr, I pray you that I may be recomaundehyde unto my masterys your moder, and unto all goode ffrendys. No more unto you at thys tym, but þe blesyde Trenyte have you in hys kepyng now and hever. Amen. At London þe vj day off Marche.
Cossen, I was crasyd þat the makyng off thys letter, but I thanke God I am ryght well amendyd, blesyd by Jhesu.
By your owen wyff Elysabeth Stonore.
To my ryght reverent and worschypffull Cosyn, syr Wyllm. Stonor, knyght.